Режиссер Ан Чжэ Хун фильмдерінің көрсетілімі

Алматыдағы Корея Республикасының Бас консулдығының қолдауымен 27 қараша күні Forum кинотеатрында корей режиссері Ан Чжэ Хунның әдеби шығармалар негізінде түсірілген анимациялық фильмдері көрсетілді. Айтулы шара әл-Фараби атындағы Қазақ Ұлттық университеті мен ҚР Ұлттық кітапханасында өткізілген «Корея әдебиеті» апталығының жалғасы ретінде жүргізілді.

Өткен ғасырдың алғашқы ширегінде корей әдебиетінің классикалық үрдісін қалыптастырған жазушы И Хё Соктың «Қарақұмық гүлдегенде» (메밀꽃 필 무렵), Хён Чжин Гонның «Сәтті күн» (운수 좋은 날) және Ким Ю Чжонның «Көктем» (봄봄) атты үш туындысы біріктіріліп, режиссер Ан Чжэ Хунның анимациясымен экранизацияланған нұсқасы көрерменге ұсынылды. Forum кинотеатрына жиналған қатысушылардың басым көбі – Т.Жүргенов атындағы Өнер академиясының анимация факультетінің студенттері және Tasqyn анимациялық студиясының қызметкерлері. Одан бөлек өнер мен мәдениетке жаны құмар жандар да осы іс-шараны тамашалады.

Бір жарым сағат уақытты қамтыған анимация аяқталысымен режиссер Ан Чжэ Хун көрерменмен сұрақ-жауап алмасты. Ниет білдіруші әрбір қатысушының суретін салып, шағын сыйлықтар берді. Академияның жас режиссерлері үшін кәсіби аниматормен тілдесіп, ой бөлісу үлкен мүмкіндік болды. Сыйға сый ретінде студенттер де қолына қарындашын алып, режиссердің бейнесін өз қиялында түрлендіре салып, арнайы табыстады.

Көрермендер режиссер Ан Чжэ Хунмен сұхбаттасып, өз сұрақтарын қоюға мүмкіндік алды:

– Ан Чжэ Хун мырза, Қазақстанға келіп, өз шығармашылығыңызбен бөлісіп жатқаныңызға ерекше қуаныштымыз. Сіздің Қазақстан жайлы алғашқы ойыңыз қандай?

– Қазақстан – мен үшін өте ерекше мемлекет. Себебі бұл жерде мыңдаған корей этносы өмір сүреді. Корей халқының тәуелсіздігі үшін күрескен қолбасшы Хоң Бом Доның тарихы да осы елмен байланысты. Әр кез шақыртуларыңызды қуанышпен қарсы алуға дайынмын!

– Жас режиссерлерге қандай кеңес берер едіңіз?

– Маған бұл сұрақ үлкен қиындық тудырады. Себебі мен студенттерге дәріс өткізуге жиі бара алмаймын, алайда жастармен кездесіп, олармен тілдесу көңілге қуаныш сыйлайды. Біздің анимациялық студиямыздың атауы – «Қарындашпен медитация жасау» (연필로 명상하기). Жас аниматорларға өзінің сүйікті ісімен айналысуды ғана ұсынар едім. Жаныңа жақын дүние нәтиже әкеледі.

–Үш анимацияның түсіріліміне қанша уақыт жұмсалды?

– Қысқа анимациялық үш фильмді түсіруге шамамен 3 жылдай уақыт қажет болды. Бұл анимациялар коммерциялық бағытта емес, ұлттың ерекшелігін көрсететін әдеби шығармаларын экранизациялау қажет болғандықтан қаражат та, уақыт та аз болды. Үш анимацияны қоса есептегенде, 30 мыңдай АҚШ доллары жұмсалды.

– Сүйікті анимацияңыз және режиссеріңіз?

– Менің сүйікті режиссерім канадалық аниматор Фредерик Бак. Режиссердің 1987 жылы түсірген «Ағаш еккен жан» анимациясын қайталап көрген сайын шабытым да қайта оянады.

– Қазақстандық немесе ТМД көлеміндегі корё сарам аниматорларын және олардың қандай туындыларын білесіз?

– Қытайдағы корей диаспорасы арасында анимациямен тұрақты айналысып жүрген жандарды білемін, бірақ Қазақстандағы аниматорлар жайында көп ақпарат білмейді екенмін. Қазір жасап жатқан жұмысымыздың тығыздығына байланысты Қазақстандық анимация жайлы зерттеп үлгермегенім үшін кешірім сұраймын, алдағы уақытта осы олқылықтың орнын толтыруға тырысамын. Бүгінгі фильмді тамашалауға жиналған сіздердің араларыңыздан да танымал анимация режиссері шығады деп сенемін!

Талғат ШАЙХЫҒАЛИ