КОРЕЙ ӘДЕБИЕТІ: 12 АҚЫН – 12 ӨЛЕҢ

И Хэ Ин (1945) – корей ақыны, эссеист және католик шіркеуінің қызметкері. 1975 жылы Филиппиндегі Сент-Луис университетінің ағылшын әдебиеті факультетін тәмамдап, кейіннен 1985 жылы Согаң университетінде дінтану саласы бойынша магистрлік дәрежесін қорғады. 1976 жылы «Бақбақ мекені» атты ең алғашқы жыр жинағы жарыққа шықты. Одан бөлек «Жанымның жалынын тұтатып», «Бүгін мен жарты ай болып кетсем де», «Уақыттың жүзі», «Жалғыз ауылдың иесіз үйі болғым келеді» сынды жиырмадан астам поэзия және эссе жанрындағы еңбектің авторы. 2005 жылы католиктік Інжілдің корейше аударма ісіне ат салысып, поэзиялық бөлімдерін аударды.

И Хэ Ин – Күз келсе болды

Бұлақ болғым келеді, бұлақ болғым,
Жылғалардан ағатын тулап толқын.
Сылдырымен сыбырлап «сүйем» дейтін,
Көк күмістей көлбіген бұлақ болғым.

Самал болғым келеді, самал болғым,
Маңдайынан құрақтың сипап солғын.
Жымыңдасқан гүлдерге масайрайтын,
Нәзік қана тербеген самал болғым.

Қоңыз болғым келеді, қоңыз болғым,
Жұлдыз нұрын арқама орнықтырдым.
Үн шығарып көмейден ән салатын,
Көрер көзге көрінбес қоңыз болғым.

Құрма болғым келеді, құрма болғым,
Тал ұшында ілінген қайғы мен мұң.
Саған ғана арналып күзде піскен,
Құрма болғым келеді, құрма болғым.

Рубрика авторы және корей тілінен аударған Талғат ШАЙХЫҒАЛИ

이해인 – 가을 노래

가을엔 물이 되고 싶어요
소리를 내면 비어 오는
사랑한다는 말을
흐르면 속삭이는 물이 되고 싶어요

가을엔 바람이고 싶어요
서걱이는 풀잎의 이마를 쓰다듬다
깔깔대는 꽃 웃음에 취해도 보는
연한 바람으로 살고 싶어요

가을엔 풀벌레이고 싶어요
별빛을 등에 업고
푸른 목청 뽑아 노래하는
숨은 풀벌레로 살고 싶어요

가을엔 감이 되고 싶어요
가지 끝에 매달린 그리움 익혀
당신의 것으로 바쳐드리는
불을 먹은 감이 되고 싶어요