КОРЕЙ ӘДЕБИЕТІ: 12 АҚЫН – 12 ӨЛЕҢ

Ким Су Ёң (1921 – 1968) – корей-жапон тілдерінде қалам тербеген билингвист ақын. Бала күнінен әлем әдебиетіне қызыққан қаламгер ағылшын ақыны Оскар Уайльдтың өлеңдерін жатқа оқып, тіл үйренуге деген ізденісін ұштайды. 1941 жылы Сонрин мектебін аяқтап, Жапонияға оқуға аттанады. Алайда оқуға жағдайы келмей, біраз уақыт театрда жұмыс істейді. Кейіннен туған жерге, одан Манчжурияда ұзақ уақыт аялдайды. 1945 жылы Кореяға қайта оралып, Ёнcэ колледжінің ағылшын факультетіне түскенмен, оқуды аяқтамай шығып кетеді. Қаламгер өзінің шығармашылығынан бөлек, аударма ісімен де жиі айналысты. Өмірінің қиын кезеңдерінде неміс философы Мартин Хайдеггердің «Болмыс және уақыт» кітабын аса қызығушылықпен оқиды. 1950 жылдары соғысқа күшпен жөнелтіліп, Солтүстік әскері жағынан Оңтүстікке жасаған шабуылда қолға түсіп, біраз уақыт тұтқында болады. Одан кейінгі өмірін тек әдебиетке арнаған қаламгердің ғұмыры ұзақ болмады. Кешкі сауықтан әдебиетші достарымен масайрап шыққан 46 жасар ақынды жолда автобус қағып кетіп, ауруханаға жеткізілгенімен есін жимастан ертесіне өмірден өтеді.

Ким Су Ёң – Айлы түн
Қашаннан бері білмеймін, тез ұйықтайтын болыппын.
Шырақсыз түнгі көшеде сенделмеймін енді мен,
Шырмалған оймен кітапқа телмірмеймін енді мен,
Бос қиялға енуден әбден қажыған түндерде.
Ауылдағы мен мұңлық –
Жарқыраған айлы түн,
Қашаннан бері білмеймін, тез ұйықтайтын болыппын.

Маған енді түс көрудің қажеті де шамалы.
Орда бұзар отыздың тоғызына шыққалы,
Тартынбастан бір сәтке арманымды тәрк еттім.
Қажуды сезу де бір ауыр мұң, қалың қайғы,
Түн, айлы түн, шаршаған түн...

Рубрика авторы және корей тілінен аударған
Талғат ШАЙХЫҒАЛИ

김수영 – 달밤
언제부터인지 잠을 빨리 자는 습관이 생겼다
밤거리를 방황할 필요가 없고
착잡한 머리에 책을 집어들 필요가 없고
마지막으로 몽상을 거듭하기도 피곤해진 밤에는
시골에 사는 나는 –
달밝은 밤을
언제부터인지 잠을 빨리 자는 습관이 생겼다

이제 꿈을 다시 꿀 필요가 없게 되었나보다
나는 커단 서른아홉살의 중턱에 서서
서슴지않고 꿈을 버린다

피로를 알게 되는 것은 과연 슬픈 일이다
밤이여 밤이여 피로한 밤이여