КОРЕЙ ӘДЕБИЕТІ: 12 АҚЫН – 12 ӨЛЕҢ

Ким Нам Чжо (1927 – 2023 жж.) – ғасырға жуық ғұмыр кешкен корей ақыны. Елдің орталығындағы Тэгу қаласында өмірге келген. Жас кезінен Фукуока, Кюсю сынды қалаларда білім алады. Елге оралған соң, 1951 жылы Сеул Ұлттық университетінің корей тілі мамандығын тәмамдайды. 1953 жылы 26 жасында «Өмір» атты алғашқы өлеңдер жинағын жарыққа шығарды. 1955 жылдан бері Суңмёң қыздар университетінде оқытушы, доцент, профессор атанып, өмірінің көп бөлігін аталмыш оқу ордасымен байланыстырды. 1980 жылдан бастап әртүрлі әдеби ассоциациялардың басшысы қызметін атқарды. 1991 жылы Согаң университетінің, 1993 жылы Суңмёң қыздар университетінің құрметті профессоры атанып, ұстазға лайық құрметпен зейнет демалысына шықты.

Ким Нам Чжо – Сенің жаныңда

Тұла-бойың мазасыз бір күй кешсе,
Шақыр мені, ұста менің қолымнан.
Шын қуаныш, үнсіз ғана құмарлық,
Бәрі сенің жаныңда.

Менің кеудемде қауызын ашқан,
О, шексіз-шетсіз, ұлы сағыныш!
Сен бар жерде мен де бармын,
Шақыр, ұста қолымнан.

Сендегі махаббат есігі ашылып,
Мен күн кешейін, сол жарық ішінде.
Жалғыздық-ай, жанымды жүдеткен,
Бәрі, бәрі, бір өзіңнің ішіңде.

Өмір сүрудің мәнін үйреніп,
Мендегі асқақ сағыныш үшін де.
Сен болған кезде, мен де боламын,
Кел бір кешейік, сол жарық ішінде!
Рубрика авторы және корей тілінен аударған Талғат ШАЙХЫҒАЛИ

김남조 - 그대 있음에                                    

그대의 근심 있는 곳에
나를 불러 손잡게 하라
큰 기쁨과 조용한 갈망이
그대 있음에

내 맘에 자라거늘
오 - 그리움이여
그대 있음에 내가 있네
나를 불러 손잡게 해


그대의 사랑 문을 열 때
내가 있어 그 빛에 살게 해
사는 것의 외롭고 고단함
그대 있음에

사람의 뜻을 배우니
오 - 그리움이여
그대 있음에 내가 있네
나를 불러 그 빛에 살게 해