ҚИЛЫ ТАҒДЫРЛЫ ГАЗЕТ: ғасырдан астам тарихы бар көнекөз корей газеті

Егемендікті аңсаған кез келген халықтың арманы – бейбітшілік. Бірлігі жарасқан елдің тұрғындары білімге, ғылымға құштар болады. Дүниені білуге ұмтылған ойлы жан газет-журнал, баспасөз арқылы әлемдік өркениетпен танысады. Жаһан және жергілікті жаңалықтармен бөлісетін Алматыдағы баспасөз ардагерлерінің бірі –жүз екі жылдық тарихы бар «Корё Ильбо» газеті.

Өткен ғасырдың отызыншы жылдары әлем тарихына үлкен өзгерістер алып келді. Солардың бірі – корей халқының Қиыр Шығыстағы атамекенінен Орта Азияға мәжбүрлі түрде көшірілуі еді. Қазақстанға қоныс аударған корейлермен бірге ұлт рухының жаны, жүрегі болған «Корё ильбо» (고려일보) газеті де жаңа мекеннен орын тапты. «Ильбо» сөзі корей тілінен аударғанда «күнжазба», «күнделікті хабарлар» деген мағынаны білдіреді.
Тарихи газеттің алғашқы саны 1923 жылы 1 наурызда Владивостокта жарық көрді. Газет корей халқының азаттығы үшін ұйымдастырылған «1 наурыз қозғалысының» (1919 ж.) төрт жылдығына арнап шығарыла бастады. Бастапқыда газет «삼월일일» (Самуоль Ириль – «Бірінші наурыз қозғалысы») деп аталса, кейін «선봉» (Сенбоң – «Авангард») болып өзгертілді.
Корейлер Қазақстанға қоныстанғаннан кейін 1938 жылы 15 мамырда Қызылорда қаласында «레닌기치» (Ленин кичи – «Ленин туы») деген атпен газет қайта жұмысын жалғастырды. Алғашында Қызылорда облыстық газеті болса, 1954 жылдан бастап республикалық газетке айналды.

Қазақ және корей халқының ортақ үніне айналған газет редакциясы 1978 жылы Алматыға қоныс аударды. 1988 жылы газет «Халықтар достығы» орденімен марапатталды. 1991 жылы газет қазіргі атауын алды. Тарих пен тағылымға бай газеттің ширек ғасыр ғұмыры мәдени астанамыз Алматымен тікелей байланысты. 2028 жылы газеттің Алматы қаласында басылып шыға бастағанына мерейлі 50 жыл толады. Этникалық баспасөз бірегейі «Корё Ильбо» газеті – тек жергілікті корей ұлты үшін ғана емес, еліміздің түкпір-түкпіріндегі білімге құштар әрбір жанның рухани серігі.

Еліміздегі татулық пен бірліктің жаршысы болған этникалық газеттердің мемлекет үшін маңыздылығы мол. Алдағы уақытта «болашақтың қаласына» айналатын Алатау (бұрынғы Жетіген) қаласында K-PARK мәдени-іскерлік орталығы бой көтеретіні жайлы хабарды алғашқылардың бірі болып «Корё Ильбо» газеті көпшілікке таратты. Жүздеген этнос өкілдерінің мәдени шоғырына айналған Алматы қаласында алдағы уақытта да осындай игі істер жалғасын табар деп сенеміз!

Талғат ШАЙХЫҒАЛИ