Тарихи саммит қарсаңында

16-17 қыркүйек күндері Сеулде Корея Республикасы мен Орталық Азия арасындағы ынтымақтастықтың жаңа кезеңін айқындайтын маңызды оқиға өтпек. Тарихта тұңғыш рет «Корея Республикасы – Орталық Азия» форматындағы мемлекет басшыларының саммиті ұйымдастырылып, оған Қазақстан, Қырғызстан, Тәжікстан, Түрікменстан және Өзбекстан көшбасшылары қатысады. Бұл кездесу екіжақты байланыстарды жаңа деңгейге көтеріп, оларды толыққанды көпжақты ынтымақтастық тетігіне айналдыруға жол ашады.

Саммитке дайындық бірнеше бағыт бойынша қатар жүргізілуде. Ұйымдастыру мәселелері Орталық Азия елдері мен Корея Республикасының сыртқы істер министрліктері, «Орталық Азия – Корея Республикасы» ынтымақтастық форумының хатшылығы және өңір мемлекеттерінің дипломатиялық өкілдіктері деңгейінде тұрақты түрде талқылануда. Соңғы кездесулердің негізгі тақырыптарының бірі – алдағы жылдары нақты нәтиже беретін бірлескен жобалармен саммиттің күн тәртібін толықтыру.

Қазақстанға ерекше мән беріліп отыр. Өйткені еліміз Орталық Азиядағы Корея Республикасының ең ірі экономикалық серіктесі болып саналады. Бүгінде екі ел арасындағы ынтымақтастық машина жасау, энергетика, пайдалы қазбаларды игеру, цифрландыру және білім беру салаларын қамтиды. Сәуір айында өткен Қазақстан–Корея келіссөздері барысында тараптар стратегиялық әріптестікті одан әрі дамытуға ниетті екенін тағы бір мәрте растап, қыркүйектегі саммитке дайындықтың негізгі бағыттарын келісті.

Дайындық жұмыстары тек дипломатиялық келіссөздермен шектелмейді. Шілде айының басында Корея Республикасының Сыртқы істер министрлігі алғашқы саммитті қолдауға арналған халықаралық жастар тобын құрды. Оның құрамына Кореядан және Орталық Азияның бес мемлекетінен, соның ішінде Қазақстаннан, жиырма жас енді. Алдағы бірнеше ай бойы олар өңіраралық ынтымақтастықты насихаттайтын ақпараттық науқандар, мәдени іс-шаралар мен түрлі жобаларды жүзеге асырады. Бұл бастама жас буынды серіктестікті дамыту ісіне тартуға және алдағы саммиттің маңызын қалың жұртшылыққа кеңінен танытуға бағытталған.

Алдағы саммит Қазақстандағы корё сарам қауымы үшін де ерекше маңызға ие. Қазақстандық корейлер тоқсан жылға жуық уақыт бойы Орталық Азия мен тарихи Отаны арасындағы табиғи алтын көпір қызметін атқарып келеді. Қазақстан корейлері қауымдастығының, Корей театрының, білім беру және мәдени ұйымдардың, сондай-ақ «Коре ильбо» газетінің қызметінің арқасында екі өңір арасындағы гуманитарлық байланыстар тұрақты түрде нығайып келеді. Алдағы саммит осы ықпалдастыққа тың серпін беріп, жастар алмасуын, ғылыми ынтымақтастықты және бірлескен мәдени жобаларды жүзеге асыруға жаңа мүмкіндіктер ашуы мүмкін.

Александр ХАН