Барлық назар мен жылу балаларға арналған

«Кореяға бару жылын» және «Корея Республикасы мен Қазақстан Республикасы арасындағы мәдени алмасу жылын» мерекелеу аясында SOS балалар ауылының астаналық бүлдіршіндері үшін Корея Республикасының Елшілігі мәдени бағдарлама ұйымдастырды.
2015 жылдан бері Корей орталығы елорданың SOS Балалар ауылында іс-шаралар, концерттер, шеберлік пен өнер сабақтарын өткізіп, үнемі қолдау көрсетіп келеді.
Іс-шараға Корея Республикасының Қазақстан Республикасындағы Төтенше және Өкілетті Елшісі Джо Тэ Ик жұбайымен, Астана қаласының SOS Балалар ауылының директоры Зәуреш Арыстановамен, аға оқытушылар, сондай-ақ балалар мен жасөспірімдер қатысты.
Оңтүстік Корея дипломатиялық миссиясының басшысы бүлдіршіндерді қарсы алып, елшілік атынан сыйлықтар табыс етті.
Балаларға таныстыру экскурсиясын ұйымдастырып, корей мәдени орталығының қызметі туралы бейнеролик көрсетілді. Сондай-ақ, кішкентай қонақтар дәстүрлі корей ойындарын ойнап, «Хварот» қағазынан корейлік көйлегін тігу бойынша семинарларға қатысып, корей тағамдарын әзірлеп, содан кейін өздерінің аспаздық шеберліктерін бағалай алды.
– Қонақтарымыздың жүздерінен күлкі кетпей, бүгінгі іс-шарадан шын жүректен ләззат алғандарына өте ризамын. Корей мәдени орталығы тұрғылықты жеріне, жынысына, жасына қарамастан барша қазақстандықтар үшін бұдан да көп түрлі және қызықты мәдени іс-шаралар өткізетін болады, - деді Корей мәдени орталығының директоры Ли Хе Ран.

София ИБРАГИМОВА,
Астана