Аналар кеңесі: Қазақстанның болашағы үшін қолдау, қамқорлық және тәрбие

2014 жылы Қазақстан халқы Ассамблеясы аясында құрылған Аналар кеңесі отбасыa институтын нығайтуға және өскелең ұрпақты тәрбиелеуге елеулі үлес қосып үлгерген жас, бірақ өте маңызды қоғамдық құрылым. Кеңестің негізгі міндеттеріне отбасылық-демографиялық саясатты қолдау, жасөспірімдер арасындағы қылмыстың алдын алу және қайырымдылық шараларын ұйымдастыру кіреді. Сонымен қатар, Кеңес әлеуметтік маңызы бар іс-шараларды өткізуге белсенді түрде көмек көрсетіп, ерекше күтімді қажет ететін балаларға назар аударады.

Аналар кеңесінің маңызды бастамаларының бірі – «Аяла» әлеуметтік қызмет көрсету орталығымен бірлескен жұмыс. Осы қызмет аясында олар ерекше балаларға арналған іс-шаралар мен мерекелік шаралар ұйымдастырып, олардың қоғамға араласуына және өмір сүру сапасын жақсартуға жағдай жасайды. Сонымен қатар, Аналар кеңесі жастар арасында нашақорлық пен басқа да жаман әдеттердің алдын алуға бағытталған бағдарламаларды жүзеге асырып, мектептерде, колледждер мен жоғары оқу орындарында тұрақты түрде дәрістер өткізіп тұрады. Аналар кеңесі қайырымдылық бастамаларды белсенді түрде ілгерілетуде, соңғы шаралардың бірі 26 тамызда Алматыда жыл сайынғы «Мектепке жол» акциясы болды. Бұл шараның әлеуметтік мәні терең, себебі оның басты мақсаты аз қамтылған және көп балалы отбасылардың балаларына, сондай-ақ жетім балаларға көмек көрсету болып табылады. Биыл Алматы қаласы Аналар кеңесінің күш-жігері мен этномәдени бірлестіктердің, сондай-ақ жеке кәсіркерлердің қолдауының арқасында «Аяла» әлеуметтік қызмет көрсету орталығының 70 баласына оқу жылын бастауға қажеттінің бәрі толтырылған мектеп сөмкесі табысталды. Шараны Алматы қаласы Аналар кеңесінің төрайымы М.Исраилова ашып, балалар мен олардың ата-аналарына жылы лебізін білдіріп, оқу жылының сәтті өтуіне тілектестік білдірді. Бұл акция Аналар кеңесі қызметінің қоғам үшін қаншалықты маңызды екенін тағы бір дәлелдеді. Белсенді жұмысының арқасында көптеген балалар материалдық қолдауды ғана емес, сонымен бірге олардың жағдайында ерекше маңызды эмоционалды ынталандыруды да алды. ҚХА Аналар кеңесі отбасы құндылықтарын нығайтуда, ұрпақты тәрбиелеуде және мұқтаж жандарға көмек көрсетуде маңызды рөл атқарады. Олардың қызметі қоғамның біріккен күш-жігері елеулі нәтижелер әкелетінін және өзекті әлеуметтік мәселелерді шешуге көмектесетінін айқын көрсетеді.

Аида КАН